Transcription
1
Reçue à Valence, le 27 mars 1573.
2
Monsieur de Gordes, je suis très marry de la surprise du Poussin parce
3
que cest un lieu d'importance, et qui empeschera la navigation de la rivière
4
du Rosne. Il fault certainement que vous preniez soigneusement garde à
5
vous quilz ne puissent rien entamer en votre gouvernement. Vous avez bien
6
faict de retenir, voyant ceste occasion, trois des quatre compagnyes
7
que vous aviez levées et les deppartir aux lieux plus necessaires ;
8
pareillement de ne sortir de votre gouvernement où votre presence est très necessaire.
9
Je me repose sur vous de la conservation et garde de mon pays de
10
Daulphiné. Je suis aussi aseuré qu'i [sic] ferez tout debvoir pour empescher
11
les dessaings des soubzlevez. J'ay pour agreable qu'il soit donné main
12
levée au sieur de Lugye des biens de sa femme qui ont esté saisiz
13
par mes officiers en faveurs des sieurs de Berne qui en ont escript ;
14
comme je vous prye leur faire entendre, vous ordonnerez doncques
15
en mon nom ladite main levée, et continuerez à me mander de voz
16
nouvelles. Je vous veulx bien advertir comme les sieurs de La Noue
17
et la Rochecheuart cognoissans lobstination et malheureuse intention
18
des Rochellois, sont sortiz de la ville et venuz trouver mon frère
19
avecques dix ou douze des premiers et principaulx gentilzhommes qui
20
commandoient en ladite ville, ayans laissé les habitans non moins
21
estonnez que despourveuz de cappitaines et gens de commandement, chose
22
qui facillite autant lexpugnation de ladite ville, pour laquelle advancer
23
mondit frère et tous mes bons serviteurs ne perdront une seulle
24
heure de temps, ayant plus desperance que jamais d'en rendre,
25
moyennant la grace de Dieu (lequel est conducteur de si justes
26
entreprises), lyssue telle que je desire, ce que vous pourrez dextrement
27
publier en lestendue de votre charge, affin de refroidir la mauvaise
28
volunté de ceulx qui l'avoient appuyée sur le subgect de ceste entreprise ;
29
pryant Dieu, monsieur de Gordes, quil vous tienne en sa sainte garde.
30
Escript à Fontainebleau, le XVIIIe jour de mars 1573
31
Charles
32
de Neufville